الثلاثاء، 20 ديسمبر، 2011

يا محلى رجعه ظباطنا من خط النـــــــــــــار !!

يامحلى رجعه ظباطنا من خط النـــــــــــــار !!



رسالتى الى جيشنا المصرى العظيم الى نسى هتافنا فى يناير الشعب والجيش ايد واحده ....ايدك ياعسكرى الى سحلت اختك ايدك ياحضره الظابط الى اقتلت اخوك ايدك يااجيش الى قتلت شيخ من الازهر ...انتم اقتلتو مصريين قتلتوا اصحابكم اقتلتوا جيرانكم احنا مش اعدائكم  انتم كنتم مننا ...بس ايدك اتقطعت بنا .. 


رسالتى التانيه لحزب الكنبه او المواطنيين الشرفاء لحد امتااا هتقولوا مؤامره وعايزين يخربوا البلد انتم بجد مصدقيين نفسكم مؤامره اييه الى يكون نازل وعارف انو ممكن ميرجعش تانى وعارف ان شخص جبان ممكن يغدر بيه امن مركزى او حتى جيش .. 
حتى الصوره لما تشوفوها تقولوا فوتوشوب نجيبلكم فيديو تقولوا لا دى مش فى مصر اصلا ....ليه مش عايزيين تصدقوا لحد امتا هتعيشوا بمخدر ان الجيش والشرطه مش بيضربوا الثوار وان طرف ثالث لسه محددناش جنسيته ايه مره ايرانى ،صومالى ،اوكرانى حتى الاطفال الامريكان صدقتوا انهم ماسكيين مولوتوف وبيضربوا على الامن المركزى مش عارفه اوصفكم باايه .... 

الدكتوره غاده كمال ..ناشطه سياسيه فى حركه 6 ابريل "دكتوره مش بلطجيه "

الاسم "مصر" اتعرت وسط كلاب العسكر 
حسن شاهين  صحفى فى جريده البديل حاول انقاذ الفتاه لكن كان هو ده جزاءه 

فيديو لاصحاب النفوس الشكاكه الى بيقولوا الصوره "فوتوشوب" 


فى نفس الفيديو ده فى ست وراجل كانوا ماشيين فى حالهم بس لما شافوا البنت بتضرب اضربوا هما كمان وكان مصير الست الى لابسه جاكت احمر كان كده .. 
منقبه تتسحل على الارض وتضرب وينزع نقابها بعد اعتقالها 
بس ابلغ رد على الصوره دى "البنات لما بتنزل بيسيبوا "الجماعه "فى البيت !!!


الناشط نور ايمن نور يحاول انقاذ فتاه من الضرب فيضرب ويعتقل !!
فيديو :شهادته 
 



فى الصوره الاولى سيده كبيره فى السن ومعها فتاه يتعرضو لضرب والاهانه 
الصوره الثانيه لحظه اعتقال الفتاه !! 
بعد خروج الفتاه من الاعتقال !! 

فتاه ايضا تسحل وتضرب !!

سبب عرض صور لبنات لتنبيه ان فى بنات بتنزل تجيب حق راااجل بشنبات مكتوب فى بطاقته الجنس "ذكر" ....

عايزه افكركم بهتاف الثوره "عيش ،حريه،عداله اجتماعيه " احنا ولا طولنا العيش ولا شوفنا الحريه ولا طبعا حسينا بالعداله الاجتماعيه لسه بنتكلم بعنصريه لسه بنحدد هيئه الانسان بشكله ولبسه ...ياحظك الاسود لو اتمسكت وانتا فى مظاهره ومش لابس هدوم نضيفه ولا شعرك مش متسرح وشكلك فيه تعويره ...انتا اكييد بلطجى انتا اكيد مش من الشباب الطاهر ابن الناس الى نزل من فتره 25يناير ل11 فبراير .......لسه بنتكلم بعنصريه وكأن الانسان الى لبسه مش زى لبسك ياراجل ياشيك ده مش بنى ادم وملهوش حق انو ينزل ويطالب بحقه زيه زيك ماهو فى الاخر مصرى ولأسف الراجل الى مش عجبك ده نازل علشان بيطلب الكرامه نازل علشان شاف بنات بتتسحل  على الارض من جيش بلده .

كلامى الاخير ..... انا من بدا فض اعتصام ابريل واستشهاد اول شهيد برصاص الجيش انا كنت فقط ضد المجلس العسكرى مرورا بحداث العباسيه ..حريق كنيسه امبابه ..المحاكمات العسكريه لمدنيين.. كشف العذريه عن البنات .. مسرح البالون ..السفاره الاسرئيله..مذبحه الاقباط "ماسبيرو" ...شارع محمد محمود ...واخيرا احداث مجلس الوزراء وشارع القصر العينى ......

احداث وعنف غير مبرر حصلت لمتظاهرين من الامن المركزى والشرطه العسكريه وكل ده ولسه بيقولوا هما عايزين ايه الى فى التحرير !!!
احنا عايزين اسقاط حكم العسكر ..واعدام طنطاوى وكل اعضاء المجلس العسكرى بسببب الدم الى نزل من كل مواطن مصرى فى الفتره الانتقاليه من 11 فبراير وهى 10 شهور من حكم العسكر لمصر .


الى عسكرى مصر ليكم الكلمات دى قصيده "يامصر هانت وبانت كلها كام يوم "الشاعر تميم برغوثى :

ياصف عسكر بدال الدرع شيلوا اتنين
25 يناير ياشباب فاكرين
كان فى انجليز ووزير الداخلية تخين
كان عندوا برضو عساكر زيكم جامدين
كانوا شبهكم أساميكم أساميهم
ياعسكرى البهوات اللى بتحميهم
ممكن يردوا عليك لما تناديهم
ياعكسرى أنا أصلى بس بستغرب
لو لاقي تاكل وتشرب قوم يا عم إضرب
إضرب عشان الوزير من ضربتك يطرب
لكن هتشتغل ايه لما الوزير يهرب
أما الشديد القوي القادر أبو القادر
برميل تلامه نشع على مصر من الأخر
لو شافته معدده تكتب أدب ساخر
ثابت يقول للهرم يا كابتن إتاخر
ولم يزل معتقد إن الهرم حيقوم
آدى الحجر والبشر قايمين ياسيد القوم
والدين حيترد ياللى عشت مداين
.............................




"يامصر هانت وبانت كلها كام يوم ...نهارنا نادى ونهار الندل مش باين"

الأحد، 18 ديسمبر، 2011

انتخابات ...فشنك

برلمان الثوره
قالك برلمان ثوره بعد ثوره شباب خرج ضد الظلم وضد حزب مزور مكتسح انتخابات 2010 "الحزب الوطنى الديمقراطى"
قالك ثوره وهيجى الشباب فى البرلمان ويحقق حلم بيحلمه وهما متاكدين ان الشعب هيكون وراهم ويساعدهم ويقف جنبهم ماهما دول شباب الثورة هما دول الى خرجوا يوم 25 فى وقت كان الاخوان والسلفيين بيمنعوا الخروج عن الحاكم...

انتخابات من غير دستور انتخابات وهيجى نواب من غير صلاحيات قالوا مش مهم الانتخابات اولا علشان البلد تستقر زى استفتاء 19مارس قول "نعم" ياخى هتدخل الجنه النصارى والكفره هما الى هيقولوا "لا" ,؛بتوع "لا" دول العلمانيين الكفره الملحديين عايزين يخربوا البلد عايزينها دوله كافره يرضيك مصر تبقى كافره ..... نجحت "نعم باكتساح وسقطت "لا" وقولنا خلاص مااشى ده راى الاغلبيه الصامته الاغلبيه الى بتاااخد رائيها مش شيوخ الجوامع علشان هما طبعا الى بيفهموا فى كل حااااجه ده شيخناااا !!

تانى تجربه انتخابيه ديمقراطيه لينا بعد الثوره هى انتخابات برلمان 2011 وكانت بدايتها يوم28 نوفمبر 2011 وكانت من اقوى الاحزاب المشاركه بالترتيب من حيث قوه التاثير على الشارع المصرى 
اولا :حزب الحريه والعداله ..."اخوان سابقا"
ثانيا:حزب النور..."السلفى سابقا"
ثالثا: الكتله المصريه ...."مجموعه من الاحزاب ايدولوجيه ليبراليه "
رابعا: حزب الوفد ...."تطبيل لنظام "
خامسا: ائتلاف الثورة مستمره..."نواب بدون فلو كلهم شاركوا فى الثوره"

وبعض الاحزاب الفلوليه والضعيفه وليس لها تاثير فى الشارع .......

كانت النتيجه معروفه مين الى مذاكر كويس وعارف ازاى بتتلعب الانتخابات ....مين الى ركز فى البرلمان وسايب شباب مصر بتموت فى شارع محمد محمود مين الى سااايب عيون مصر بتتفقع من جنود الامن المركزى ....

طبعا معروفيين ومعروفه وسااخه تنظيم معتمد على مصلحتى اولا فييين 

الاخوان والسلف 
الاخوان والسلفيين اهتموا بالدعايه الانتخابيه وسابوا شباب مصر فى دعاايه مع الغاز المسيل الى هرا صدورهم ..........مبرووك عليكم كراسى البرلمان مبروك عليكم الاكتساح بس التاريخ معروف ومش هينسى خضوعكم لسلطه على حساب الشباب الى من غير انتفاضتهم كان مكانكم معتقلات مبارك وسجون حبيب العادلى الشباب اليبرالى الملحد الكافر هو الى خرجكم من الجحور هما ياسلفيين ابسببهم بتنزلوا الشارع وتصلوا فى الجوامع وانتم عارفيين خلاص مفيش امن دوله تانى ...
نهااايه كلام كله يأس من جماعات بتنتمى لاسم "الاسلام " بس بدون عقل والاغلب "عنصرى" مش بيتكلموا الا على المراه والخمر والعرى لايعرفون ان من الافضل ان "تربى مخك ..قبل دقنك" 


اتحدث عن نفسى ...
وكان قرارى قبل النزول لانتخابات يوم 28 ان ابطل صوتى واعطى صوتى لقائمه الثورة مستمرة وان ابعت رساله لمجلس العسكرى على ورقه "الفردى "بعباره " يسقط حكم العسكر " وفلا نزلت ووضعت على ايدى فلايرز "لا لمحاكمات العسكريه لمدنيين " ودخلت لجنه الانتخاب واعطيت صوتى لقائمه الثوره مستمره وفى الورقه العريضه لمرشحين الفردى وضعت هتاف القله المندسه الى عايزين يخربوا البلد ....
وانا فخوره جدا ان كتبت الجمله دى على الورقه يمكن ريحت ضميرى واحترمت شهداء محمد محمود ومصابين التحرير 


                 ايوه انا بهتف ضد العسكر ......يسقط يسقط حكم العسكر 

الاثنين، 7 نوفمبر، 2011

عمر سليمان " الحــــــج والكـــــــوسه "

عمر سليمان يتسبب فى تعطيل ألاف الحجيج بعد غلق طرق المشاعر عليهم 

عمر سليمان ذهب الى الحج بدعوة شخصية من الملك وفتح له جناح خاص في قصر العائلة المالكة المطل على الحرم المكي مباشرة واسمه قصر الصفا

 من قصر الصفا انتقل سليمان يوم التاسع "وقفة عرفات" لخيمة الملك فى عرفة وبعد اذان المغرب تم ايقاف كل الطرق الى المزدلفة حتى عبرت مواكب سليمان وضيوف الملك  
انتقل سليمان من عرفة إلى المزدلفة وكل الحجاج محشورون خلفه لثلاث ساعات وفي مدخل منى تم منع الناس لمدة نصف ساعة من الدخول حتى ينتهي من الرجم

ولأول مرة ف التاريخ ينفرد شيطان بشيطان حتى انتهى أحدهما من رجم الأخر ثم فتح الطريق للملايين كي يرجموا الشيطان المربوط بعد ان فلت السايب
   الكارثة الحقيقية ان الحجاج بعد الرجمة الكبرى اتجهوا الى مكة لاداء طواف الافاضة ثم السعي لكن تم غلق منطقة مكة المركزية تماما لمدة ساعة

غلق مكة ادى الى تكدس السيارات على كل الطرق الأمر الذي جعل بعض الحجاج يصلون مكة بعد 12ساعة مكدسين في رحلة كانت تستغرق في الحج من 3-4ساعات
بعض العمال المصريين رأوا سليمان جالس على كرسي متحرك ومعه قرابة عشرون شخصية أخرى محاطين بعشرات من القوات الخاصة يطوفون ف ساحة الحرم الخالي
بعض العمال المصريين رأوا سليمان جالس على كرسي متحرك ومعه قرابة عشرون شخصية أخرى محاطين بعشرات من القوات الخاصة يطوفون ف ساحة الحرم الخالي 
لمصدر : الكاتب الصحفى : عبد الفتاح على .. من الأراضى المقدسة 

الأحد، 18 سبتمبر، 2011

ياغراب يامعشش .....رجاله التراس اهلاووى

بدا يوم الجمعه يوم 9/9 بعد صلاه الجمعه مسيرات فى كل شوارع مصر وكانت مقررة من اكتر من شهر وكان المشاركين فيها قوى سياسيه مستقله وشباب 6ابريل والتراس الاهلى وابتعد الاخوان والجماعات الاسلاميه عن المشاركه قبل ماتش الاهلى وكيما اسوان وبعد الاحداث الوقحه من جانب الامن المركزى محدش كان يصدق ان الالتراس هيكون دورهم مهم فى يوم الجمعه او يشاركوا كتنظيم بس كالعادة غباء النظااام هو دايما الى بيحرك الناس لشارع ....الاسلوب الوقح الى استخدمته الشرطه واعتقالهم لبعض افراد التراس الاهلى خلى الشباب ينزلوا الجمعه لمطالبه بحريه الالتراس وزى مابيقوله فى اغنيتهم (الحريه )افهم يانظاام غبى مطلبى حررررررررريه .بس واضح فعلا انو نظام غبى وبيزداد غباء كل يوم تقريبا كراسى الحكومه كلها بتشع غباء فى المسئولين .
التراس الاهلى الى هما شباب الثورة وشباب محترمين يجمعهم انتماء وحبهم لنادى الاهلى ولمصر ودورهم الموثر فى اوئل ايام الثورة واستشهاد بعدهم يتحبسوا ويضربوا علشان عبروا عن رائيهم فى الشرطه المصريه وبسبب يضحك تانى انهم شتموا المتهم والمحبوس "حبيب العادلى "وزير الداخليه السابق لكن احنا بس الى شايفينه متهم ومحبوس بس الداخليه الحاليه ورجال الشرطه والامن لسه مقتنعين انه هو الوزير وهو حامى الداخليه .....خسارة كمان ناسيين انهم اتعلم عليهم يوم 28 يناير وهربوا زى الفران .
مع او ضد الى حصل لالتراس الاهلى ناس قالوا يستاهلوا دول عيال قليله الادب وصيع وناس تانيه قالوا حررام والداخليه زى ماهى بلطجيه الانقسام فى الشارع لمايوصل اننا نفرح ان شباب فى سن صغير يتحبسوا ويتبهدلوا علشان شتموا متهم دى مصيبه وخيانه لثورة الى نزلت علشان كرامه الانسان اولا ولكن الواضح ان بعض المصريين وهم فئه كبار السن لا يعرفون شي اسمه الكرامه وحريه الراى وان ممكن نعارض ونواجه شخص اكبر فى السن لان هو الغلط واحنا الصح ويقولوا كلمتهم الشهيرة "عيال قليله الادب " برضوا ناسيين ان العيال دى هما الى ضحوا بنفسهم علشان تعيشوا انتم فى كرامه وميروحش عمركم هدر فى ذل بس لاسف برضوا بتنسوا !!

9/9 جمعه تحديد المسار 

الجمعة، 2 سبتمبر، 2011

افلام العيد ........وثورتااااه

السينما بعد الثورة والقائمه السوداء وفنانيين الفلول والافلام الهابطه كل الكلام دة سمعته قبل ما تيلير افلام العيد ينزل وكان عندى احساااااس غريب ان الكلام دة ولا هياثر فى ثقافه غالبيه الشعب وان الناس هتنسى ومن الاخر الشعب بيحب الهلس والناس عايزة تفرح بعد كل النكد الى بتشوفه ......
وفعلا الاعلانات الالام بدات تنزل من نصف رمضان تقريبا وكلها افلام تافهه جدا زى
(شارع الهرم ) بطوله سعد الصغير ودينا الراقصه وطبعا الاتنين بيقدموا فن فى غااايه التييييييييييت .
(انا بضيع ياوديع ) تهامى باشا ووديع الاعلانات الى كانت بتقدمها قناه ميلودى وكانت بتعتمد على القله الادب وكانت اعلانات ناجحه جدااا الى جعلت اتنين بيقدموا اعلانات لابطال افلام سينمائيه وطبعا منسوش انهم يجيبوا وجهه سينمائى جديد لاميتا وهى عبارة عن اغراء وبس .
(بيبو وبيشير )فيلم خفيف بطوله منه شلبى واسر ياسين وهو كان من الفنانيين المشاركين فى الثورة يعنى فيلم خفيف محترم هتدخله هتضحك وخلاص وهتكون متاكد انه مش هياذى اسرتك .
(تك تك بوم ) محمد سعد الفيلم بيتكلم عن لجان شعبيه فى الاحياء وقت الثورة يعنى بيتكلم عن الثورة بس بشكل  مضحك .
اول يوم العيد معظم الشباب بينزل بيروح السينمات والناس عايزة تفرح وفعلا الناس دخلت السينمات وفى اول يوم عيد حقق فيلم (شااارع الهرم ) مليون و700الف جنيه فى يوووم يااجدعاان
يليه (تك تك بووم )مليون و200 الف اما فيلم (بيبو وبيشير) 300 الف جنيه .

دة دليل قاطع ان غالبيه الناس ولا بتشوف الفيس بوك ولا التويتر ولا تعرف ان فيه محاكمات عسكريه ولا يعرفوا اى حاجه والناس دى وبالاعداد دى هى الى هتاثر فى انتخابات برضو وان جمهور السينما ولا هيتغير عن الفرجه على الافلام الهلس .....لكى الله ياثورة